Letter to Daddy (Pa hnena lehkhathawn ama hnen thleng ngai lo tur si chu)

Dear Pappa,
Khawvel hi a lova makin a lova nunrawng ngai em em ve le! Ka chhuan em em ka pa,anihna takah chuan thi ve thei turah che pawh ka lo ngai ngailo che a,hmana thihna chungchang min hrilh thin pawh khan mi chan turah ka lo ruat thin a. Ka piin i ruang a rawn hmuha "Bawiha, i pa hi"a tih pawh khan ka rilruin ‘ka pa a thi theilo’ ka ti a, mahse i ruang meuh ka hmuh takah kha chuan hai rual a ni ta lo. Ka rilru na beidawng lutuk khan engmah ka hre mumallo; ka biangah mittui luang tur awmlo mahse ka thinlung a ruma,ka rilruin ka tap zawih zawih zawk anih kha.

Kha hun thim tak kha engtin nge ka paltlang tih hi vawinni thleng hian keimah leh keimah ka inzawt nawn fo thin asin.Ka pa,i tello chuan khawvel hi nuam ka van ti lo em! I hmangaih thinte leh i lainate zingah ka zawng che a,mahse i awm si lo;hmuh phakloh kawlvalenchhamah i awm anih zawk ka ring a,i lo haw leh maite hi ka beisei reng thin asin.Tlaikhaw thim dawnahte hian ka nu leh unaute hrilh ngam si lovin kawngkharah ka dak reng thin a,khua a thima chaw ei hun thleng pawhin ilo haw chuang si lo,zanah mut a lo huna khumlaizawlah nangmah ngaihtuah reng chungin ka mu meng reng a,thlahrang i sawi thin kha ka hre chuak a,i thla tal hmuh beiseiin ka lo nghak reng thin che a, mahse bei tidawng zualtu mai alo ni leh si.Khawvar dawnah beiseina zawng zawng a beidawn tawh hnuin harsa fein darkar hnih vel ka muhil ve a, zing ka thanharh ve leh rilruah i awm leh nghal thin.Kan in chhak step tak ngial pawh kha chawllo chuan ka kal chhuak zo tawhlo anih hi!

Ka pa,thil reng reng chu a dam zawnga lak tur i tih kha changchawiin ‘hnah hlui chu hnah tharin a thlak tur alawm’ tiin ka rilru ka ti paukhauh a, mahse rei a daihlo. ka thinlaiah i hlui thei mawlh si lo.Matric ka fail tuma min fuihna tawngkamte kha ka van hre nawn leh chak tak em! Matric ka pass tuma i lawmzia leh keimaha beiseina i neih lenzia i hmela langchuakte kha hmuh leh theih ni sela aw...vawikhat chauh tal i tanga bei leh theih ni se ka van ti tak em, naupang te kan nih laia ka u nen i mal chunga min thuttir a thawnthu min hrilh thinte kha ka la theihnghilh miah lo asin!

Zirna avanga i ngaih em em i seilenna khawpui Shillong ka paltlang laite khan a mi deh dan a va dang em! Ka mittui ka sum zo nganglo a ni, ka pa, min hrethiam ang che aw...Mittui a ni lo, ‘lungngaihna tui’ thinlung beidawng tawp atanga lo chuak a ni zawk e, ka mitthlaah i cham reng a, ka hmuh mai che rinnain min rawn tuam nawn leh bawk a,Shillong khawpui chu zah em em chungin ngawi rengin mittui nen ka thlir liam ta,ka rilrua thil awm leh a nat dan tur chu i hre thiam mai ang ti raw!
A tawp ber atan chuan heti hian ka thlah liam ang che
"Daddy welcome me and hold me tight, When the time comes for me to response my heavenly call. But for the time being I should say so long Dad. I’ll waite patiently till I cross the River Jordan."

I hmangaih em em,
I fapa.
written by K.Lalrinzuala