Fa tihtlak hi a pawi em?

Kum sawm vel kaltaah khan Zoramah chuan fa tihthlak chungchang hian sawi a hlawh viau thin a, mipui pawhin kan bengkhawn hle thin. ‘Hemi hian/chumi chuan fa a ti thla...’ tia sawi sep sep tur kha an awm fo thin a. Khatiang ti kha chu kan hmuh dan leh thlir dan a dang daih thin anih kha. Tunah erawh chuan fa tihthlak tih vel hi kan sawi peih ta lovin ‘thil naranah’ kan neih ta zawk emaw tih mai tur a ni. Mahse he thil hi ‘ngaia neih’ ngawt chi a ni lovang. Biblea kan hmuh angin Pathian chuan nu pumchhunga kan awm lai atangin min siam a, Zawlnei Jeremia pawh a pain hmain Pathianin a ko tih kan hmu bawk. Chhul chhungah hian mihring hi a kimin siam a ni a, chhul chhunga naute chuan na a hre thei a, pian hun hmaa zai chhuah pawh an dam thei a, ch chuan nunna hi nausen pian hma atangin amahah a intan tawh a, a lo pian rualin kan hmu ve chauh zawk a ni tih a tichiang.
Bibleah hian fa tihthlak thu hi a tam lo hle mai a, Bible hunlai hian hetiang khawpa sualna rapthlak hi a la awm loh avangin sawilan a ni lo pawh a ni thei zawk awm e. Biblein a sawi lar em em zawk chu fate hi Pathian malsawmna an nih thu leh fa nei thei lo chu anchhia ang hiala ngaihna an nei zawk thin a. Hetiang anih avang hian nute chuan fa an hring thei lovang tih an hlau zawk em emin, mahni fa pai lai tihthlak ngat phei chu an ngaihtuahnaah a la thleng pha lo hial zawkin a rinawm a ni.
Tin, nunna nei mihring hi kan duh avang ngawta neih theih a ni lova, vawiin ni thleng hian nupa tam tak, fa awt em em, mahse nei thei hauh lo engemaw zat an la awm; mithiamte rawnin thenkhat fa nei thei ta sawi tur an awm bawk.Chubakah nunna hi a hlu em em a, mihringte hian hei hi kan siam theih loh leh midangte hnena kan pek theih loh thil a ni. Chuvangin chhul atanga siam famkim nunna nei mihring hi ngaihhlut leh zah tur a ni a, Pathiang anpuia siam kan nih avangin mi tupawh hian hlutna thuk tak kan nei vek a, hnualsuat theih a ni lo.