‘Some men’s ambition is art; some men’s ambition is fame; some men’s ambition is gold;my ambition is the souls of men.’ Kum 1904,June 24-a General William Bootha’n Buckingham Palace a tlawh tuma King Edward VII autograph bua a thuziak atang hian mihringin a tum leh nih a duh ang zelin ‘HLAWHTLING’ tehdan chi hrang hrang a awm tih kan hmu thei. William Bootha inhlawhfakna hmun Whitefield pawnbroker dawr chu ‘Piantharna Dawr’ tiin hming an phuahsak a,mi tam takin chumi hmunah chuan piantharna (chhandamna) an chan avangin. A damchhungin anmahni pual atan in leh lo, ram leh sumte khawlkhawm lem lo mahse a thiltum leh a rahchhuahte kan thlir chuan mi hlawhtling a ni thung. Ram leh hnam pasalthate thlirna tlang atang chuan ram chhan nan leh mipuite humhim nana an nunna hlan aia hlawhtlinna ropui a awm chuang lo. Ral hlauhawm leh hmun derthawngah hma an hruai a, chawimawina nopui dawm ni-ah erawh a hnukhawia tan an tum thin.
Tunlaiah erawh chuan kan value system reng reng hi money oriented a nih deuh vek tak avangin mi hlawhtling kan chhiar dan pawh a dang ta a, hei hian thuk takin kan ram leh hnam hnuk a khawih chhe mek niin a lang. Kan ram (Zoram) bik thlir ta ila; sumdawngtuin hleihluak takin hlep a tuma, anmahni dawrtute dinhmun ngaihtuah miah lovin zahthlak khawpa sangin thil man an chhiar to fo. Pachhe zurui leh hmeithai zuzuarte laka YMA in action lak a awlsam hle laiin sorkar hnathawk lian hlemhletna leh eiruknaa mi sawikaite laka kutthlak tur erawh chuan YMA kut a zumzuk leh tlat lawi si thinte, YMA leh kohhrana a kul a taia an tang reng thei maite hian ngaihtuah a tithui. Kan ram leh hman hmangaihtu political party hrang hranga kan politiciante han thlir ila, opposition an nih laia pa sa pan leh hil ve tak takte pawh term khat sorkarna an chelh chuan an sa a thain an mawm hmarh thin, hei hian sorkarna an chelha hna an han thawh tak tak hian an taksain a ngeih ta hle nge ram leh hnam hmakhua thlir miah lovin ‘a hausak renrualloh’ tiin lal an hrawt ta zawk tih hi zawhna tling a ni. An thlalak thlir ila, BEFORE leh AFTER hi inanglo thei tak a ni. Thenkhat phei hi chuan an bial tana hmasawnna ngialnghet pakhat te pawh an siam hmain building lian leh car nalh tak tak an nei hman hial thin awm asin! A changin an thawk hova, a changin an insawichhe tawn leh lawi a, mipui lam erawh nihna ngaiah nghet takin an ding a, partya an rinawmna avangin an intualvuak lo chauh thung.
Sorkar zemzen lam han thlir lahin level puite phak loh chu vantlang leh nupui fanaute lak atang ngei pawha hnawn mai theihna kailawn a ni a, level puite phak tur erawh chuan hlawh phu lohva in leh lo, bungbel leh rothil dangte neih a ngai lawi si. Chutiang nei tur chuan thawhhlawh atang ringawta tih theih anih loh avangin thawh loh hlawh lak tur zawn a ngai. Kohhran lahin thawhlawm ip kan siamin, "Ani zawng a post a fuh em a, tuk deuh hlek mahila a tlanchhe lovang…" kan la tizui. A thla bi hlawh lam aiin thawhloh hlawh a huihnem theih dan lamin rilru a pawt zawk tlat. Kohhran fathang ei-rawngbawltute lahin necktie nen; pachhiate leh chanhai zawkte tan hnaih ngam loh khawpin kan inhmuamup a; duhsakna thilpek hraw min hlui theite bulah erawh pheikhawk hrui phelhtu ni awm a mawiin kan inhnukhniam leh lawi si. Hei hian kan moral standard tha lo leh value system dik tawk lovin ram leh hnam, mimal leh vantlanga nghawng tha lo a neih thukzia a tilang. Kan hna kawng tinrengah hian tum leh tihturah chiang ila; chumi tihlawhtling tura huai taka a man petu leh rinawm taka beitute hi chawimawi thiam ila; an sum lakluh lam ringawt thlir lovin an thiltuma an hlawhtlinna hi Hlawhtlinna dik tak chu a ni tih kan hriat a tul hle.
Min Hmangaihtu Ka Chunnu leh Zuapa.
In tha leh tui; in theihna zawng zawng ka tan in lo luan raltir tawh a, ka tana in hlutna leh min hmangaihnate hi ka tawngkam thiamna leh ka finnate hian a hril chhuak zo ngai dawn lo anih hi! In tello leh in mi enkawlna, min lo tuamhlawmna leh hmangaih kuta min dawmna tello chuan tunge maw ka nih ve tehlul ang le?! Engmah reng ka ni ngai lovang...Ka tan hian in va hlu tak em! Nupa inhmangaih takte pawh hi an inthen thin a, an inhmangaihna leh induhtawnnate chuan a tawp chin a thleng fo thin...in tana harsatna siamtu mai ka nih lai pawhin nangni erawh chuan min hnawl ngai loh kha! Ka sual leh awm that duh lohvin in thinlung a na a, thil tlemte ka tihthat ve chhun a awm chang erawh chuan in thinlung na zawng zawngte a damin ka sualna leh diklohna rengin in hriatrengnaah hmun a chang hlen thei lo..."True Love never keeps a record of wrongs"...In va hlu tak em ka tan hian...Nangni aia hlu zawk hi ka nunah hian he hringfate zingah an awm thei dawn em ni ngai le! An awm hi rem ka la ti thei lo....In tan tih theih neih ve ka va'n chak tak em! In phut lo tih ka hria; chu pawh min hmangaihna avang tho a ni...chungte chuan in hlutna a va tizual si em! Ka pa, vankohna chhanga min kalsan ni atang khan e i hlutzia hi ka hmuchhuak tan dawn chauh a lo ni. I tellova ka hring nun famkim loh dante hi aw...A tuar tawhtute chauhvin an hrethiam ang...Ka tana i hlutna leh i thatnate hi a rilin a va thuk tehlul em!! Ka sawi chhuak thiam lo naa ka chhungril ber atang hian i hlutna leh i rilziate hian min fan fo thin a ni. Ka nu duh tak, damlo chaklo tak chunga he khawvel hunbi min la chhiarpui thei hi ka va lawm em...A thim a var thlu lova ka tana i thawhrimzia ka hria...ka hre reng fo ang...ka hriatrengnate hian ka tana i lo tawrhna leh thawhrimnate hi theihnghilha an phatsan ka phal ngai lovang a, ka hriatrengna a fim chhung chuan zing ni sara zan daifim ang maiin an thar sar reng fo dawn a ni. "Aw Lalpa, kan damchhung nite chhiar dan tur min zirtir ang che..."
2 comments:
vu685 on running uk,caterpillarskor,caterpillarbotasargentina,gymsharksalenederland,xn--mizunocip-8yb,keen zapatos,asics adidasi,altrashoesnederland,gymshark uae wd211
sp511 hey dude japan,pitviperoculos,supra footwear norge,danner uk,hey dude schuhe damen,zapatillas supra,timberland outlet,aldo mexico,danner norge if853
Post a Comment