Khawvel thiamna leh finna, ei leh bar zawnna kawnga thannate hian khawvel hi a sawr zim sawt hle, ‘Global village’ tihte chu tawngkam tlanglawn tak a lo ni ta. Company tam tak rawn dingchhuakin kut insuihin han tiho viau mahse ‘a ber’ nih tum vek an nih avangin hawihhawm takin an inhmelmak thap hlawm. Mipui/customer hipna tur leh company dang aia san zawk duhna avangin ‘bik riauna’ neih vek an tuma, chu chuan mithiam bik leh thei bikte man a rawn tisangin mipui nawlpui erawhchuan an hlutna an hloh tial tial thunga.
Tunhma chuan doctor atan MBBS passed kha a tawk em em, tunah erawh chuan‘specialist’,‘super specialist’...chumai ni lovin ‘a bik’ an nihna pawh an thensawm leh zel a. ENT specialist ni tawh lovin a then Eye specialist, Throat specialist, etc a ni ta zel, an man a sang tual tual a, ‘bikna’ nei lo an dawng tulh tulh thung a.
Hei hian kan thiltihna kawng tinrengah ‘mi bik’ ni tura tan lak a tulzia a tichiang em em a ni. Lehkha zir ngawr ngawr lam ni lovin infiamna emaw, thilsiam lam emaw, chi hrang hrang a awm thei ang. Tunlai khawvelah hian ‘Mi hlu’ ni tur chuan ‘mi bik’ nih a mamawh hle a ni.
Min Hmangaihtu Ka Chunnu leh Zuapa.
In tha leh tui; in theihna zawng zawng ka tan in lo luan raltir tawh a, ka tana in hlutna leh min hmangaihnate hi ka tawngkam thiamna leh ka finnate hian a hril chhuak zo ngai dawn lo anih hi! In tello leh in mi enkawlna, min lo tuamhlawmna leh hmangaih kuta min dawmna tello chuan tunge maw ka nih ve tehlul ang le?! Engmah reng ka ni ngai lovang...Ka tan hian in va hlu tak em! Nupa inhmangaih takte pawh hi an inthen thin a, an inhmangaihna leh induhtawnnate chuan a tawp chin a thleng fo thin...in tana harsatna siamtu mai ka nih lai pawhin nangni erawh chuan min hnawl ngai loh kha! Ka sual leh awm that duh lohvin in thinlung a na a, thil tlemte ka tihthat ve chhun a awm chang erawh chuan in thinlung na zawng zawngte a damin ka sualna leh diklohna rengin in hriatrengnaah hmun a chang hlen thei lo..."True Love never keeps a record of wrongs"...In va hlu tak em ka tan hian...Nangni aia hlu zawk hi ka nunah hian he hringfate zingah an awm thei dawn em ni ngai le! An awm hi rem ka la ti thei lo....In tan tih theih neih ve ka va'n chak tak em! In phut lo tih ka hria; chu pawh min hmangaihna avang tho a ni...chungte chuan in hlutna a va tizual si em! Ka pa, vankohna chhanga min kalsan ni atang khan e i hlutzia hi ka hmuchhuak tan dawn chauh a lo ni. I tellova ka hring nun famkim loh dante hi aw...A tuar tawhtute chauhvin an hrethiam ang...Ka tana i hlutna leh i thatnate hi a rilin a va thuk tehlul em!! Ka sawi chhuak thiam lo naa ka chhungril ber atang hian i hlutna leh i rilziate hian min fan fo thin a ni. Ka nu duh tak, damlo chaklo tak chunga he khawvel hunbi min la chhiarpui thei hi ka va lawm em...A thim a var thlu lova ka tana i thawhrimzia ka hria...ka hre reng fo ang...ka hriatrengnate hian ka tana i lo tawrhna leh thawhrimnate hi theihnghilha an phatsan ka phal ngai lovang a, ka hriatrengna a fim chhung chuan zing ni sara zan daifim ang maiin an thar sar reng fo dawn a ni. "Aw Lalpa, kan damchhung nite chhiar dan tur min zirtir ang che..."
No comments:
Post a Comment