Zoram Inthlanpui a hnai ta!

'Ber' thla kan hmang chho zel a, Krismas boruak lamte rilrua a lo lan deuh ruau ruau laiin inthlan hun tur puan a lo ni ta a, chu chuan Zoram pum a fan nghal a, November thla tawp lamin rilru a rawn luah khat ta mup mup a ni ta ber awm e. Politics hi ram leh mipuite hmakhua atana kawngchhehna pawimawh tak anih avangin ngaihthah a remchang lova, kan bengkhawn hle tur zawkte pawh a ni thei awm e. Politics thumal kan hman hian political party mal pakhat bik rilruah a awm duh fova, hetianga political party mala nghehtlutna, ram leh mipui tan enge an thawh tih lam ngaihtuahna awm lo hian ram a siamtha mawh khawp mai. Ambrose Bierce chuan, "Politics hi mahni hlawkna tura mipuite hminga thiltih hi a ni," a ti hial a ni. Mimal hlawkna atana politics kheltute hian ram an tichhia a, mipuite moral hi a tikhawbaw zo thin. Politics hi ram leh hnam hnuk tak tak leh keini kristian state tan phei chuan kan thlarau lam nun thlenga impact thuk tak nei thei anih avangin ram inkaihhruaina tha leh sorkar dik kan neih theihna tura tan lak hi a pawimawh hle a. Kan vote hmang dik tur leh sorkarna chelhtute khalh ngil tura ram tana inpekna thinlung kan neih a mamawh em em a ni. A chhiat a that-a tuartu leh a hlawkna teltu tur chu keimahni theuh hi kan ni si a.