Nun Hlu

Mihring nun hi kan chhut fo ka ring. Kan naupan deuh laia ‘pitar/putar’ kan tih maite kha tunhnua ka thlir kir hian kum 55 bawr chho velho kha ni ta berin ka hria. A kum neitu inhriat dan leh midangte min chhiar dan hi inanglo thei tak a lo ni. Chutiang chu anih avangin hriatloh kara kum uaithla lam; damchhung hun chanve thlen mai hi a awl dawn hle. Chu chuan damchhung hun hlutna min chhut tir a, pian ni, thla leh kum inang, hnathawh pawh inangte zingah hian ‘nun hlu bik’, ‘mi hlu bik’ tia sawi tur an awm nual. Chu nun hlutna chu engtia siam tur nge kan nih tak ang? Thiam thil chi hrang hrang leh nihna ropui tak takte chelh theia awm hi nun hlawhtlinna chu ni ngei mahse chu chuan nun hlutna tak tak chu a phawkchhuak em? Midangte tana inhawnna leh tanpui ngaite tana nun luanchhuahna leh inpeknaah hian nun hlutna chu thuk takin a innghat a. Khawvel thila nihna sang tak chelh pawhnise midang tana inhawnglo leh inpe thei lo mi chuan midang tan hlutna a nei lo, thamral lo tur sulhnu hlu a hnutchhiah miau loh avangin leihnuaia chhilh hnan anih rualin a hming a dai nghal thin. Midangte hmusit leh hnuaichhiah thintute aiin mamawhtute tana ‘inpeih reng mite’ hian nun hlutna an haichhuak tha zawk a, an taksa tawihral hnuah pawh an chanchin chu thawnthu ngaihnawm a tling reng thin.