Ka Lalpa duhtak min awmpui ang che

He hla hi Henry Francis Lyte a phuah a ni a, tlailam hlaah chuan a lar ber pawl a rawn ni chho ta zel a ni. A phuah chhan tak hi ni (day) lo tlailam ta hi ni lovin hringnun lo uaithla zel lam hi a ni zawk. Kum 1847 nipui laia a phuah a ni a, a thih hma lawka Berry Head, Devon a tlawh tuma a phuah a ni. A phuah chhan kan sawi tak ang khian tlailam atan ni satliah mai lovin, mihring nun uaithla leh inthlakthleng thinah hian Pathian a ngaihawmziate, nun lo la awm leh tur atana beiseina thuk tak a awmziate a tilang chiang hle a ni.
He hla hi thlamuanpui pawh an tam tawh hle, nurse Caveli chuan kum 1916 a Belgium inkahna hmuna a awm laiin he hla hi a lo muanpui em em tawh a, kum 1912 a Titanic lawng pil tur kan thlir chuan he hla hi band party ten muangfan ruih leh lungrun tak maia an ham liam riai riai kha kan hmu bawk ang
A phuahtu thih kum 100-na champha 1947 a an serh tum chuan London chanchinbu chi hrang hrangah he hla chanchin hi an chhuah uaih uaih a, chumi zinga nula pakhat chuan, "He hla hi a mawl hle a, mi naran pawhin a awmzia hriatphak a ni a, a thukna lamah lah mi thiam tak takte tan ngaihtuah tham a ni bawk si" tiin a ziak a ni. He thuziak tawite hian he hla thuk leh ril zia hi a hril chhuak tha hle, a satu leh a ngaithlatu thinlung hi thuk takin he hla hian a fan thin a ni.
Wembly khuaa inkhelh hawnna atan he hla an hman tuma program siamtu chuan hla sak tura a ziak chhuah /thlanchhuah dawn tum hian thiltihtheihna thuruk engemaw riauvin he hla hi sak turin a ziaktir niin a sawi.
Kan khualzin kawng khawhar tak hi engtikniah emaw chuan kan vailiam a la tul ve ang a, thihna jordan lui kan daikai ni a lo thlen hun chuan khawvela kan thilneih hlu ber berte leh kan ropuinate hian awmzia an nei tawh lovang. Chutih hunah chuan Chhandamtu awmpuina i mamawhzia a chiang tawh ang.Hriatlawk loh zinkawng zawh mek kan nih avangin i nun uaithla lamah chauh ni lovin tunah pawh Chhandamtu awmpuina chu i mamawh zawk a ni.