Passing Out Parade

Nikum 2007 khan mizo nula Carolyne d/o Pu PC Zoramsangliana Aizawl chuan hlawhtling takin Army officer short course training OTA Chennai atang hian a zo tawh a, nimin 20/Sept khan Passing out parade neiin mizo tlangval Johnny Malsawmzuala Sailo s/o Pu Lalrinliana Sailo Lengpui chuan short course training hi a zo ve leh ta a. He short course training an zawh hian Lieutenant rank pek niin Arsi pahnih an bel nghal a. Kan thalaite zingah Army officer kan nei chho zel dawn niin a lang a, thil lawmawm tak a ni. Tin, nula leh tlangval tan zir theih anih avang leh a service hi a thain a zahawm bawk a, intihhmuh zel atan pawh thil duhawm tak a ni.
Mizovin computer (Khawl thluak nei) kan hmelhriat tirh lam, a rooma kan luh dawn pawha pheikhawk kan la phelh deuh thlap lai, thenkhat phei chuan kan chhungril zawng zawng pawh lipse vek thei tur khawpa kan tawngpawng ngaih ropui viau lai khan, Aizawl nula pakhat chu phailamah computer zirin a awm ve a, kumpui linglet meuh a awm hnuah rawn haw ve lehin a zir ber computer lam erawh a khawih chhunzawm lo, hna pawh a thawk ta chuang lova, ‘pasal a nei’ tih mai loh chu a chanchin han sawi tur a tam lo viau. State pawnah cheng tam tak sengin kum engemawzat kan awm hnuah a tir atanga tum mumal leh ruahmanna fel kan neih loh avangin ‘a rem rem’ thawk turin nu leh pate hnen kan pan leh a. Phaia lehkhazir ve ta chu tlemin kan lo intichangkang ve deuhva, ruahman lawkna fel kan neih loh avang erawh chuan kawngzawh tur kan chiang thung si lova, chawm hlawm hautak tak kan ni chho ta thin a ni.
Mizote hi state lian lo takah hlang tha ang reng takin kan inkhung a,kan inpawhtawnna leh inpeizawn tawn thinna hian kawng tam takin kan phurrit min chhawk zangkhai a, state dangte ngaihtuah chuan ‘kutdawh pawh kan awm lo’ tih mai tur khawp kan ni; kan savun ip erawh a muk hran lo thung.
Tin, eizawnna tur kawng emaw ruahmanna kan siam pawhin innghahna tlak leh tlo a ni em tih hi kan zir ngun a pawimawh fo. ‘A chang’ a zau tha em? Hmasawn zel thei tur chi a ni em? Hlawh hmuhna mai piahlamah kaisan zelna leh finna leh thiamna sang zel neih theihna tur a ni em tihte hi thlir a tul fo.
Heng Army, Civil, Police service leh thildang dangah hian kum (age) leh thiamna hi a pawimawh hle a, chu chuan kan inruahmannaah kan nih tum atana inzir bingna leh a hun taka duhthlanna fel kan siam a tulzia a tilang. A hniak tam lam apiang zawh ve mai lovin tum leh duhthlanna felfai nen hmalam thlir thiam a pawimawh hle a ni. BA/MA passed tawh hnuah kan nih tum kan tichiang thei chauh thinte hian kan khawthlir tawizia a tichiang hle a ni.
A tira kan tarlan OTA (or Short Service Commission)a lut duh tan pawh lo inruahman lawk theih tak a ni a. NCC a tang tawh, ‘C’ certificate hmu tan phei chuan Combined Defence Services exam kaltlang a ngai ve lo. Inruahman lawk duh tan lah college tin deuh thawin NCC wing an nei hlawm bawk si.Inruahman lawkna tha chuan hlawhtling tura inbuatsaih turin a pui a, kum naupang leh hma zawkin hlawhtlinna rahbi nghet a pe a ni.