Benjamin Franklin chuan, "I will speak ill of no man and speak all the good I know of everybody," tiin midangte laka a rilru put dan tur leh a awmdan tur a lo sawi chhuak a. Hei hian awmdan tur mawi leh duhawm zawk min hnutchhiah tha hle. Midangte rel chinna hian keimahni lamah eng hlawkna nge a thlen a, kan mi rel thinte tan eng ang taka danglamna duhawm nge a thlen tih inzawt ta ila, a tha zawnga rahchhuah a neih kan hre mang kher lovang. ‘Sawisel’ leh ‘Rel’ tih erawh thliar hrang thiam ila; tlang taka sawiselna chuan siamthatna leh rah duhawm a chhuah fo a ni.
William James chuan midangte lawm leh fak nih duhna hi mihring mize inthup ril tak a nih thu a sawi a. Hengte hian inpumkhatna tha a awm theihna tura chaw tha chu thatna lai inhmuhsaka inchawimawi tawn hi a ni tih kan hmu thei awm e.
A dik tak chuan mi tupawh; mi a leh mifing pawhin fak hi kan lawm vek a.Thian pawl thiam hmingthang Andrew Carnegie chuan midangte tlinna leh thatna lai a hriatte chu anmahni awm leh awmloh lai pawhin a sawichhuakin a fak mawlh mawlh thin a, chu chu thian tha a neih theihna thuruk pawimawh tak a ni. R.W Emerson chuan, "Ka mi hmachhawnte reng reng hian kei aia tlin zawkna leh san zawkna pakhat tal an nei zel a ni tih ka hria a, chuta tang chuan ka zir thin a ni."a ti.
Midangte tlinna leh thatna lai hmu thei lote bula awm hi thil hahthlak leh mimal zalenna hloh theihna awlsam tak a ni a, midangte tlinna leh thatna hmu theitu nun erawhchu a hlim a, midangte a fuih chak bawk thin a ni.
Fakderna Awka erawh chu mi pangngai tan chuan a lawmawm lo mai ni lovin a huatthlala zawk a, a tlo lovin rah tha pawh a chhuah tak tak hek lo.An awm loh laia rel ching, an awm lai erawha fak leh hlarh thin mite hian thinlung hrisel lo an vei a, tihdam thuai loh chuan anmahni ngei a eichhe vek thin. General Obregona limah chuan, ‘I hmelma nangmah rawn beitu chu hlau suh la, nangmah fakdertu che erawh hlau zawk rawh,’ tih thu hi zu inziak a!
Min Hmangaihtu Ka Chunnu leh Zuapa.
In tha leh tui; in theihna zawng zawng ka tan in lo luan raltir tawh a, ka tana in hlutna leh min hmangaihnate hi ka tawngkam thiamna leh ka finnate hian a hril chhuak zo ngai dawn lo anih hi! In tello leh in mi enkawlna, min lo tuamhlawmna leh hmangaih kuta min dawmna tello chuan tunge maw ka nih ve tehlul ang le?! Engmah reng ka ni ngai lovang...Ka tan hian in va hlu tak em! Nupa inhmangaih takte pawh hi an inthen thin a, an inhmangaihna leh induhtawnnate chuan a tawp chin a thleng fo thin...in tana harsatna siamtu mai ka nih lai pawhin nangni erawh chuan min hnawl ngai loh kha! Ka sual leh awm that duh lohvin in thinlung a na a, thil tlemte ka tihthat ve chhun a awm chang erawh chuan in thinlung na zawng zawngte a damin ka sualna leh diklohna rengin in hriatrengnaah hmun a chang hlen thei lo..."True Love never keeps a record of wrongs"...In va hlu tak em ka tan hian...Nangni aia hlu zawk hi ka nunah hian he hringfate zingah an awm thei dawn em ni ngai le! An awm hi rem ka la ti thei lo....In tan tih theih neih ve ka va'n chak tak em! In phut lo tih ka hria; chu pawh min hmangaihna avang tho a ni...chungte chuan in hlutna a va tizual si em! Ka pa, vankohna chhanga min kalsan ni atang khan e i hlutzia hi ka hmuchhuak tan dawn chauh a lo ni. I tellova ka hring nun famkim loh dante hi aw...A tuar tawhtute chauhvin an hrethiam ang...Ka tana i hlutna leh i thatnate hi a rilin a va thuk tehlul em!! Ka sawi chhuak thiam lo naa ka chhungril ber atang hian i hlutna leh i rilziate hian min fan fo thin a ni. Ka nu duh tak, damlo chaklo tak chunga he khawvel hunbi min la chhiarpui thei hi ka va lawm em...A thim a var thlu lova ka tana i thawhrimzia ka hria...ka hre reng fo ang...ka hriatrengnate hian ka tana i lo tawrhna leh thawhrimnate hi theihnghilha an phatsan ka phal ngai lovang a, ka hriatrengna a fim chhung chuan zing ni sara zan daifim ang maiin an thar sar reng fo dawn a ni. "Aw Lalpa, kan damchhung nite chhiar dan tur min zirtir ang che..."
No comments:
Post a Comment