Chil (Saliva) hi!!

‘Chil hi’ tihin han tan ngawt mai ila, ka thil lo ngaihtuah chian em em ngai lem loh, tui hnang satliah, ka chhunga a awm a tenawm lem lo, mahse chhak chhuah a kan ten em em ni si. Amaherawhchu pawimawhna nasa tak a lo nei a. Ka ti naltu, chaw ei paitawih puitu a nih mai bakah hian pawimawhna tam tak a nei a ni. Mithiam ten tun hma deuh leh tun hnai maiah research nasa tak tiin an han zir chiang a. Diagnosis hmanrua atana tangkai thei hle tura ngaih a ni ta hial a. Chil hi tuiril hnang satlaih mai a ni lova. Thisen in components hrang hrang a nei ang tho hian chil pawh hi thil chi hrang hrang inpawlh a ni a. Chil ah hian 98% vel hi tui a ni a, a bak chu thil hrang hrang inpawlh, protein pawimawh tam tak bakah DNA leh nachhawkna te pawh a awm a. Thisen leh chil hi an inpawh a tih theih awm e, natna hrik leh damdawi thisen a awm te hi chilah a rawn hnam chuak thei a. Hemi hmang hian diagnosis hrang hrang a lo tih theih ta a ni. Natna en nan thisen la kher lova lo chhawk (alternative) theitu chu chil hi a ni a. Chil chhak mai a ni, a harsa lo hle. Thisen lak hlau mi tan, thisen lak remchan lohna hun leh hmun atan leh a buaipui zui a awlsam avang te hian he test hi hmun thenkhat ah chuan an duh hle. Natna thenkhat chil atanga daignose theih ka han tarlang ang e:

HIV – Kum 2004 khan Food and Drug Administration (FDA), USA chuan chil hmanga HIV hrik enna hmanrua hman phalna a pe a. Hemi hmang hian minute 20 chhung lekin 99% a dikin result a pe thei a ni. He hmanrua hi OraQuick Rapid HIV-1/2 Antibody Test a ni a, OraSure Technologies Inc ho siam a ni. Sjogren’s Syndrome – He natna hi autoimmune disease an tih ang hi a ni a, mahni taksa natsa sual tu (immune cells) in mittui leh chil siamtu thal (gland) a tichhia a. Chil hi bio-marker a hmangin thisen leh biopsy lak kher ngai lovin a en theih a ni.

Malaria – Malaria hrik zawn nan thisen aiin chil leh zun atangin a him zawk tiin Johns Hopkins Bloomberg School of Public Health’s Malaria Research Institute a mi te chuan 2006 khan an lo zir a. A chhan chu hmun tam takah malaria leh HIV vei tamna ramah te chuan thisen lak atanga HIV kai palh a hlauhawm vang a ni awm e. Tin, population in malaria damdawi an resistant dan zir nan te pawh hmanrua tha tak a ni. Kam leh lung natna – Saliva based test kit an tih pakhat battery hmang chu 2005 kum khan Illinois a researcher te chuan an hmuchhuak a, minute 15 vel lek chhungin lung natna leh kam vel (peridontal) natna an neih leh neih loh a hmuh theih a ni.

Hnute cancer – Hnute cancer hi a hma thei ang bera hriat chhuah a nih chuan hmeichhe nunna tam tak a chhanhim theih a. Salivary test hian blood test aia thatna a nei ve nual. A him a, a man a tlawm a, a na lo bawk. Amherawhchu he test hi FDA in America ramah chuan 2007 thleng khan he hmanrua hi clinic a hman phalna a la pe lo.
By
Lalchhandami Tochhawng
M.Phil (Biotechnology) Loyola College, Chennai