Homosexuality

Chennaia Theological College pakhatah ‘mipa intihmeichhia’ hian theology zirin Lady hostel ah an hotute chuan an awmtir tih ka hmuh chuan a profile ah s/o or d/o tick tur ni ang tih min ngaihtuah tir a. Tin, dated 28.June.2008 a www.misual.com ah India ramah pawh tuai leh patil ten khawvel eng an rawn hmachhawn ve ngam ta tih ziak ka hmuhte chuan ka ngaihtuahna a tikal chho zel a.
Khawthlang ramho hian homosexuality hi an pawmzam nasa hle a. Ram ropui, hausa leh thiltitheiho tihdan apiang zawmpui ve hi hmasawnna leh changkanna nia ngai kan tam bawk si avangin homosexualiy chungchanga an ngaihdan zau tak pawh hian khawvel pum hi a chiah hnehin Zoram pawh chu thli chuan min thlawhkhum bik lo: Chanmari leh Sikulpuikawn inkarah kein kal la, tuai eng zat nge i hmuh?.... Kum 4 kum 5 vel kal ta atang khan hmun hrang hrangah tuai hmuh tur an tam a, tuai an pung a nih loh pawhin an inlar nasa ta tihna a ni tal ang.(Source: www.misual.com ‘Aizawlah tuai an tam’. posted on 26/jun/2008)
Khawvel thang mek leh hmasawnna um phak tura theihtawp kan chhuah hlawm avangin mi personal life-a lo va inrawlh leh intihbuaite kan duhloh bakah kan hman ta lo hle. Tin, mimal zalenna kan neihte pawh mahni duhdan ang ngeia hman duhna a lo lianin ‘mimal dikna leh chanvo’ kan chawilar sawtin mahni dinhmun leh nihna sawhngheh tuma khawvel finna leh Pathian thu lakkawpa siamrem tumna a lian tulh tulh ni pawhin a lang. “Tuna ka awmdan ang hi Pathianin min siam dan alawm…Ama anpuia siam kan ni a, kan nihna ang theuh hi kan inzahsakin kan inpawmpui tlang tur a ni” tia tanhmun siam kan tam ta.
Amaherawhchu Inpawlna hi mipa leh hmeichhe inkarah chauh hman hi Pathian duh dan a ni. Pathianin mihring- ‘Adama’ tan a kawppui tur awm mi a siamsak khan mipa ni lovin Hmeichhia a siam a, chi tam tak thlah pung tura A duh avangin. Mipa leh mipa emaw hmeichhia leh hmeichhe inkar atangin Pathianin inthlah pung tura min tihna hi puitlin theih a ni lo mai ni lovin; mipa leh hmeichhia nih hlutna leh Pathian tum dan kalh leh hnualsuatna a ni zawk.
Inthianthatna leh inkawmngeihna thuk tak hi kan mipat/hmeichhiat puite nen neih theih a niin ngaihhlut tur pawh a ni. Amaherawhchu tisa chakna leh hurherhna kawng atana hman erawh Pathian thu leh zirtirna nen a inmil lova, chumi atanga inthiarfihlim tur chu kan ni thung.
Dr. Zairemthiama chuan, “Mipa/hmeichhia nih phunga than chhoh dan leh rilru put hmang hi tlakna mual leh boruak (environmental factors) hian nasa takin a nghawng a. Phir zawng fian phel ang (identical twin), an genetic makeup pawh thuhmunte zingah research tih a ni tawh a. Phir khing (a phirpui pakhat zawk) thenkhat homosexual an nih laiin an khing lehlamte an ni ve tlat lo. Hengte hian, homosexual hi nih chawp a ni a, homosexual ni sain tumah an piang lo tih a tichiang.” tiin a sawi. Chutiang chuan thenkhatin kan pianpui/nihdan tur ve reng emaw kan tih; Pathianin min siamdan leh duhdan nena inmil si lo hmangin thlem leh bum kan ni thin a.
Chutih rualin Pathianin mihring hi chhia leh tha duh/thlang thei leh kan hun leh boruak tawn azir zela thutlukna tawp siam tura mawhphurhna leh zalenna min pek theuh avangin thil sual dang sim san theih ang bawkin homosexuality pawh hi sim san theih a ni.