Ka Lawm e Lalpa

Ka Lalpa Isu, misual ka nih lai meuh pawhin I mi hmangaihna chu fak tlakin kan tan hian I lo lantir tawh a, chu hmangaihna tuipui chuan tun thlengin min la chawi reng anih hi. I khawngaihna avangin phu loh khawngaih rawngbawl hna min chantir a, ka chakloh lai ber pawhin min phatsan lovin ka kiangah i awm reng thin. Ka chauh leh ka tluk changtein nangin min kai tho thin a, tanpui ka ngaih leh mamawh hun apiangah ka tan 'Awma' nih i bang ngai hek lo. Ka duhna leh chak zawng i hnena ka rawn thlen apiang nangin min ngaihtuah sak thin a, ka tana tha tur tawk chauh zelin i thatnate chu min hmuhtirin min hruai thin a, ka tan chu chu a hlu em em a ni. I hun tiam ang zelah hian thil hi a lo inher rem dik ber zel zawk a ni tih hun hian a rawn hril dik thin si a!

En teh Lalpa, i hnena theology zir dilna tawngtaia ka rawn hlan hun leh ka chak vanglaite khan engmah reng i ti lova, hotute thinlngah pawh ka duhna tipuitling tur zawngin thu reng i sawi lo. Mahse chumi atanga kum 9 hnuah I hun tiam a lo thlenga, I remruatnain kawng min hawnsak ta a, ka va lawm em! Kum 2005 te kha chuan 2009 thleng zir tur nih chu a va rei tehlul em...mahse kar lovah a lo ral dawn ta mai si. Examte zovin, graduation serivce hmang zovin BD chu i khawngaihna avangin ka lo chuang chhuak ve ta hlawl mai. Lalpa a dik tak chuan mumangte pawh a ang rum rumin ka hria exam hnuhnung ber ka ziah zawh ni phei kha chuan!! Ka va lawm tehlul em!

Ni e, kum 4 chhung chuan thil tam tak a lo thleng hman reng mai! Phaia zir tura kan kal tuma kan zirna tur hmun min thlah thlengtu ka nau Manuni chuan kan haw leh min nghak zo ta lovin Chatuan ram min lo pansan ta a, min lo nghak thleng ve se min va lawmpui dawn tehlul em... Tin, kan haw hun nghakhlel em ema min thlir rengtu, kan kal dawn pawha lung leng taka mittui nena min thlahtu, tawpchin awm lova hmangaihna thlum leh nema min chawi tleitu ka nu pawh tunah chuan a taksate a lo awngrawp ta hle mai. Kan haw erawh min lo nghak thleng hram se ka va duh tehlul em Lalpa. Kan rila rah a tute, hmuh a chak em em thinte'n a hnen an thlen hunah a lo lawm peih ngut tawh ang em tih tur khawpin a taksa a lo derthawng ta si. Ka nu duh tak, lo tang fan fan la, kan lo haw trep tawh e, i tute'n exam an bei mek a, an zawh veleh rawn haw kan tum e. Lalpa, ka nu hi chakna thahrui leh taksa tharin han thuam nawn leh teh khai...ka dil che a, ka ngen takmeuh che a ni. Rilru fim, thinlung hlim leh taksa harh vang tak nen ka nu hi hmuh ka duh a ni...Amah ngei pawhin a tute hi rei tak an awmbo tawh avangin hmangaih taka lo kuangkuah a duh ngei dawn asin Lalpa...Khawngaih takin a nunna, a chakna leh a rilru, a taksate hi I van mannain chawm nung thar leh la ka va ti em... Ka nu min hmangaih leh min ngai em emtu, a rei tawh love, thla khat em pawh a ni tawh love kan rawn haw hun tur hi...mahse Lalpa, ka nu dinhmun ka ngaihtuah erawh chuan nikhat hi a va rei tawh tak em!!!

Lalpa, nun kawng chhuk/chho leh hun hlimawm leh hun harsaah pawh ka kianga awm i thulh ngai lo, I talhtum leh I tiangin min thlamuan thin a, I hmangaihna leh thlamuanna thlifim chuan min chhem harh leh thin a ni. Ka nu hnenah pawh nangin thu I sawi a, natna khuma chau taka a mut lai pawhin 'Lalpa chu min vengtu a ni a, ka tlachham lovang....thihna hlim kawr ruam zawh mahila thil tha lo reng reng ka hlau lovang' I lo tih tir a, ka va lawm tak em! Kan kawng turte nangin min ruatsak thin a, kan tan hian i rintlak reng a, kan rinawm loh leh rintlak loh lai pawhin nang erawh I pangngai reng thin.

I khawngaih hliahkhuhna leh hruaina duhawm tak avanga ka zirlaite zir zo theia ka awm hi ka va lawm em, ka phu loh i thatna tam tak min chantirte avangin ka lawm em em a ni Lalpa. I khawngaih rawngbawl hna min pek thawk turin kan hmun tur Training college lam kan pan leh dawn ta, chakna tharin min thuam la, I lam thlira, min kohna tipuitling leh hlen turin min tanpui ang che. I malsawmna tam tak min dawn tirte avangin ka lawm em em a ni. Ka lawm e Lalpa.