December ni hnuhnung ber a lo thlen tawh hi chuan Lalsangzuali (Fam) in mawi leh lungrun taka a sak ‘Kumhlui aw ding rih rawh..’ tih hla nen ni tla tur kan thlir liam ruai ruai thin anih kha, a va lunglenthlak thin em! Hun leh kum ral ta vawiin hian ka thlir kir a, krismas bawr vel leh kumhlui thlah zana hlim taka ka tlaivarpui thin thian thenkhattechuan mual min lo liamsan nual tawh mai. Hlim taka tual kan chaiho hunlaite mitthlain a chhuikir a, kum 30 zet ral tawh mahse nimin ral ta ang mai khan ka hriatrengna leh suangtuahna mitthlaah hian an la chiang em em a ni. Nu leh pate thlazar hnuaiah muang leh nghakhlel em emin Krismas hunpui lo thleng tur kan thlir a, tlangsam a rawn par a, thawmhnaw thar leh krismas ruai a hnai a ni tih kan hria a, kan rilru a zangkhai hle tawh thin anih kha!
Krismas ni a lo thleng a, in tinah chhangban ei tur a awm a, kurtai nen kan lek lawrh lawrh mai a, khangte khan krismas hi a ti masi bik em em thin.Krismas nia thawmhnaw thar; a thar rim la nam ram ram khawpa thar kan ha chhuak a, mahni kha nalh ber niin kan inhre theuh mai a, nuam ve tak a ni. Primary sikul kan kal thin laite kha aw...Sikulah aieng leh chi thak chawhpawlh kan han pai a, kan duhsak zawng thian thate bak kan liahtir phal lo, thenkhatin sawhthing an rawn pai thung a, tunlai sikul naupang thilpai nen chuan a inang lo hle mahse khatih hunlai kha chuan a tui thlawt a ni. Thian inkawmngeih tak e ti lo chuan rual u zawkte’n "chala chil hnawm hmasa sa..." an tih tawh kha chuan a tawpah inbakkaih a ngai leh nge nge thin. Class X zirlaia kan class hming ziah tlar hnuaia "Kan la ngai dawn mang e khuareiah" tih kan ziahte kha. A ngaite tein kha thuziak kha la awm mahse a hming neitute erawh tunah chuan kan kim thei tawh lo; thenkhat chhungpuinu an ni a, thenkhat sorkar hna tha tak thawkte, mahnia huan/lo neia taima taka hnathawkte...thenkhat thlanmuala kan thlah liam takte an ni. ‘Khuairei’ pawh anih hma hauhvin kan karah daidangtu an tam ta hle mai! Thinlung leh hriatrengnaa a daih hauh loh laiin kum in herliam zel erawh chuan khuarei leh hmanlai ah a chantir zel si a.
Ni e, hei hi hringnun lamtluang chu ani miau si. Hriatloh karin hun hi a lo liam zel a, kan thiante leh kan hmangaih kan nu leh pa, leh unaute pawh kan then a lo tul zel dawn a ni. Kum 2008 pawh kan thlah liam leh mek ta, he kum hian kan nunah thil tha leh hlimawm; hriatrengnaa cham hlen tawh tur tam tak min thlen ngeiin ka ring, kawng thenkhatah erawh chuan kohkir leh a siamthat chakawm tak tak thilte pawh kan tawk thei e. A tha leh tha lo lam atanga thlir pawhin kohkir leh duhna kan nei mai thei, amaherawhchu kohkir an ni tawh lo ang a; hriatrengnaa cham hlen tawh tur a tha leh tha lo lam pawh a hnutchhiah thung ang.
Englekhawle kum 2008 chu ‘Dam takin’ tia kan thlah liam a lo ngai dawn ta...Kan hun mualliam tur hi thlir kir ila;hun kal tawhte avanga lungleng leh khawhar leh inchhir avanga indawmkun mai lovin; kan hmaa chona awm hmachhawn turin ruahmanna felfai siam ila; hlawhchhamna leh hminghliauna kan lo nei anih pawhin hun/kumthar lo thleng tur hi Pathian kuta tlulut chungin beiseina sang zawk nen i pen lut ang u.
Min Hmangaihtu Ka Chunnu leh Zuapa.
In tha leh tui; in theihna zawng zawng ka tan in lo luan raltir tawh a, ka tana in hlutna leh min hmangaihnate hi ka tawngkam thiamna leh ka finnate hian a hril chhuak zo ngai dawn lo anih hi! In tello leh in mi enkawlna, min lo tuamhlawmna leh hmangaih kuta min dawmna tello chuan tunge maw ka nih ve tehlul ang le?! Engmah reng ka ni ngai lovang...Ka tan hian in va hlu tak em! Nupa inhmangaih takte pawh hi an inthen thin a, an inhmangaihna leh induhtawnnate chuan a tawp chin a thleng fo thin...in tana harsatna siamtu mai ka nih lai pawhin nangni erawh chuan min hnawl ngai loh kha! Ka sual leh awm that duh lohvin in thinlung a na a, thil tlemte ka tihthat ve chhun a awm chang erawh chuan in thinlung na zawng zawngte a damin ka sualna leh diklohna rengin in hriatrengnaah hmun a chang hlen thei lo..."True Love never keeps a record of wrongs"...In va hlu tak em ka tan hian...Nangni aia hlu zawk hi ka nunah hian he hringfate zingah an awm thei dawn em ni ngai le! An awm hi rem ka la ti thei lo....In tan tih theih neih ve ka va'n chak tak em! In phut lo tih ka hria; chu pawh min hmangaihna avang tho a ni...chungte chuan in hlutna a va tizual si em! Ka pa, vankohna chhanga min kalsan ni atang khan e i hlutzia hi ka hmuchhuak tan dawn chauh a lo ni. I tellova ka hring nun famkim loh dante hi aw...A tuar tawhtute chauhvin an hrethiam ang...Ka tana i hlutna leh i thatnate hi a rilin a va thuk tehlul em!! Ka sawi chhuak thiam lo naa ka chhungril ber atang hian i hlutna leh i rilziate hian min fan fo thin a ni. Ka nu duh tak, damlo chaklo tak chunga he khawvel hunbi min la chhiarpui thei hi ka va lawm em...A thim a var thlu lova ka tana i thawhrimzia ka hria...ka hre reng fo ang...ka hriatrengnate hian ka tana i lo tawrhna leh thawhrimnate hi theihnghilha an phatsan ka phal ngai lovang a, ka hriatrengna a fim chhung chuan zing ni sara zan daifim ang maiin an thar sar reng fo dawn a ni. "Aw Lalpa, kan damchhung nite chhiar dan tur min zirtir ang che..."
6 comments:
I ziak lunglenthlak hle mai. Lalsangzuali hi keini paw'n kan play nasa khawp asin. "Nunhlui ngaih a sawt lo kan hma lam i thlir ang," tih hi a dik viau na a, zawm reng chu a har ngawt mai.
Kumthar chibai le!
In hmanlai hi a la rei lo em mai a!!! Lalsangzuali zai velte kha a ni mai a, In nun hlui ngaih leh kan nun hlui ngaih a hun a in hlat deuh e tih mai loh chu a ngaihawm thlawt alawm ka hre thiam khawp mai che. Lunglente hi thil hrehawm emaw an tia, kei nuam ka tih zawng tak a ni. Hmanlai hun thlirkirte hi nuam ka ti, chuvangin Chhawrtui khuate ka han fanga a nuam asin!!!
@faka Kumthar chibai le...Kumthar ruai kil tur a awmloh chuan kan kut chi lo hawi vak vak mai a ni ber e!! Xavier family-in dinner ei turin min sawm hlauhva kan chhungin kan va kal a, hlim takin hun kan va hmang...parawla krismas leh kumthar hman chu eng tak ang maw le...i hlim viau tho ka ring e
@Kiamlova & Puii:
Ekhai...dam takin London in thleng leh ta maw.... 'A la rei lo...'tih theih pawh a ni dawn nem...Nia lunglen veng veng mai hi nuam ang reng tak chu a ni. Chhawrtui...mahni seilenna hmun leh hma hian hmun a luah thuk reng dawn anih hi! Mahse a hmuna kal ai mahin ralkhat atanga han ngaih vel leh nunhlui han chhui vel hi a nuam zaw mahin ka hria...
Hun kal tawh suangtuahnaa thlir veng veng hi nuam ve dueh ania.... A ngaihnawm hle mai.
Thudang-Chennai kan rawn paltlang ni a duat taka min lo mikhual leh airport a min dawngsawng leh enliam leh avangin kan nupain lawmthu kan sawi e.
"Class X zirlaia kan class hming ziah tlar hnuaia 'Kan la ngai dawn mang e khuareiah' tih kan ziahte kha".
In lo ching ve thin a ni maw, keini pawh kan desk kha kan ziak rang nasa mai ni loin kan ker rang nasa thin a. A thing hle nang a, a hunlai chuan awm tho e. I tilunglenthlak lutuk.
Post a Comment